كيف التزمت بالدايت مع زوجي واولادي :
الصراحه ماكان سهل أبدا ، لان كل المغريات كانت موجوده قدام عيوني ، خاصة بالويكند لم يطلبو بيتزا او شاورما ولا برقر ، ولاّ حتى اكل صيني ، كنت التزم يوميا ، بس لم يجي الويكند ، وخلاص أكون منظفه البيت والاولاد روشتهم وعشيتهم ومواعين ، بعدها تجي الطاقه مخلصه ، لا سألوني تبغي تطلبي معانا ؟ علطول أوافق .
ف الاتزام ماكان سهل أبدا ، جات فتره ان صرت اخبص كل ويكند ، وباقي الأيام التزم ، وصرت أتشكى ليش وزني ثابت !! الين ماكتشفت ان تخبيصة الويكند هادي ! تخرب عليا التزام أسبوع ! وصرت اكلم نفسي : دحين أنا كل الأيام التزم وبتمرن واقعد اتعب واشتغل وبعض الأيام يالله أدف تفسي دف ! بالنهايه اخبص بالويكند ! صراحه تعبتي نفسك ياسُكون. خاصة اني اكتشفت اني بدوامه قاعده أدور وارجع بنفس الدوامه ! تصدقو اني قعدت سنين وانا كدا !!!
ف لم تناقشي مع نفسك وتراقبي مع ذاتك ، فجاه تكتشفي نفسك اكثر .
بعدين قلت بنفسي : طيب ايش اسوي دحين انا ! امّا اقعد دحين اجهز وجبات واضغط مع نفسي أفف ياكرهي للدايت !! والتجهيز
صراحه فكرة تجهيز الوجبات صعبه عليا ، خاصة اني بطبخ للعيله والأولاد وزيادة مواعين ( ماعندي غسالة مواعين ) يعني فوق الضغط ضغوووط !
واكتشفت بعدين اني ماحتاج اجهز وجبات ، اجهز فقط اللي عائق الأكبر عندي وهو البروتين ، البروتين صعب احصله وبالقوه اطبخه ، لكن لقيت حل يسهل عليا ان التزم بالدايت وكان لازم غصبا عني اني أسويه ، ولاّ اخسر نفسي وجسمي .
خطة الالتزام ، وبدايتي باتباع المرونه :
- تسهيل وسرعة صنع الوجبات مثل شي مايحتاج له طبخ مثل الساندويتشات ، زبادي جرامولا جاهز
- اخزن كمية صدور دجاج يكفيني أسبوع ، عشان متى ماختجت خرجت البروتين سخنته وأكلته ، واذا صادف وخلص ، افتح علبتين تونه ، والرز اخذه من طبخ العيله ، والخضار اقطعه حق أسبوع واطبخه وأخزنه بالثلاجه. والسلطه اسوي كميه كبيره وأرميه بالثلاجه كل مره اطلع اللي يكفيني وأكله.
- الحلا تجهيز بارات شوكلت من البقاله وصل اللهم وبارك. ( مع مراعاة السعرات طبعا ) -
- اتبع المرونه إذا خلص عليا توست خلاص اخد صامولي حق مدرسة الأولاد ، خلص عليا دجاج البروتين اخد سكوب بروتين ، خلص الفواكه عندي اخد تمر ، المرونه ثم المرونه
- إذا صادف اضطريت اختار من مطعم ، أشيك على منيو المطعم واشوف السعرات ( كل مطعم يكتبو تحته سعرات الوجبه بخط صغير )
- بالمطعم اختار سلطه واطلب منهم يخلو صوص السلطه على جمب مايخلطوه بالصحن ، لان ادري انه الصوص قنبله زيوت ودهون
كدا أنا رتبت نفسي حتى في أضيق الحالات اتبع المرونه دائما ، لان الحياه تغصبني غصبا عني ، وانا لازم اجاري هالتيار بذكاء.
تعليقات
إرسال تعليق